$ 0 0 گئنه بايرام، ائديب اوْنبئشگون اقامت، گئتدي نئچه وقت بيزلر ايله ائتدي ظرافت، گئتدي چونكي ايش- گوج يوْخايدي، هئي ياتيب، هئي مورگوله ديك بيزي تنبلليگه بايرام وئريب عادت، گئتدي سو دان- اوْد دان چوْخ آتيلديق، آچالار بختيميزي باهاليق آچدي ولي هر زادي راحت، گئتدي مئيوه مئيدانلاريني گزدي بيرآز نؤوروز عمي گؤردو هر ياندا يازيلميش باها قيمت، گئتدي گؤردوكي، تكجه بادمجان اوْنا قسمت اوْلاجان گؤزو ضربدن بؤيويوب، ائيلهدي وحشت، گئتدي راديونو دينلهدي، تيلويزيونادا ائتدي نظر گؤردو شادليق يئرينه وار قورو صحبت، گئتدي ملّي بايرام ساييليرميش بيزه بو نؤوروز اگر هر وطنداش نييه سالجاق اله فرصت، گئتدي؟ پوللو چون ايستهدي لاپ ملّي توتا بايراميني اوْدور «آنتاليا»، «دوبئي» ائيلهدي نيّت، گئتدي! يوْخسولون دا قاپيسي باغلي قاليب اوْنبئش گون اؤزو قالدي، ولي بختي ايله سعادت، گئتدي گؤي- گؤيهرتي تاپيب، هر قيزكي دوگون سالدي بو ايل هم قوْيون، هم كئچي ائتدي اوْنا لعنت، گئتدي بير زرنگي وار ايدي، يوْنجالارا سالدي دوگون ياخشي يار، بختي اوْنا ائيلهدي قسمت، گئتدي ايكي يوز الليمين اوْلموشدو بو ايل بايرامليق ائتدي بئش يوز نفر آنجاق بيزي غارت، گئتدي مئيوه- شيرني وار ايكن، ائل بيزه لاپ عاشق ايدي چونكي بوْشقابلاري بوْش گؤردو، جماعت گئتدي موْكئت اوستون بزهدي پوسته- توْخوم قار- قابيغي اوْ زمان ائتدي قوْناقلار ائوي خلوت، گئتدي بو يازيق بايراما- «آرش»!- اورهگيم چوْخ ياندي بيزيم احوالي گؤروب، چكدي خجالت، گئتدي